სასამართლოს განცხადება კოტე კაპანაძის და თეიმურაზ იარაჯულის ბრალდების სისხლის სამართლის საქმეზე

2009 წლის 11 ნოემბერს თელავის რაიონულმა სასამართლომ გამოიტანა განაჩენი კოტე კაპანაძისა და თეიმურაზ იარაჯულის სისხლის სამართლის საქმეზე.

კოტე კაპანაძესა და თეიმურაზ იარაჯულს ბრალად ედებოდათ სამსახურებრივი უფლებამოსილების ბოროტად გამოყენება.
კოტე კაპანაძის და თეიმურაზ იარაჯულის მიერ ჩადენილი დანაშაული გამოიხატა შემდეგში: საქართველოს ფინანსთა სამინისტროს საგადასახადო დეპარტამენტის თელავის საგადასახადო ინსპექციის გადამხდელთა საგადასახადო აუდიტის (შემოწმების) სამმართველოს მთავარ ინსპექტორებს კოტე კაპანაძეს და თეიმურაზ იარაჯულს დაევალათ  ინდ. მეწარმე `აიდინ მაილივში~ გეგმიური გასვლითი საგადასახადო შემოწმების ჩატარება. შემოწმება მოიცავდა 2005 წლის 1 ოქტომბრიდან 2007 წლის 1 ივლისამდე პერიოდს. შემოწმების პროგრამის თანახმად, სხვა საკითხებთან ერთად კ.კაპანაძესა და თ.იარაჯულს უნდა შეემოწმებინათ გადამხდელის მიერ განხორციელებული იმპორტის ოპერაციების შემოსავალ-გასავალში გატარების სისწორე და ამ ოპერაციებით ბიუჯეტთან ანგარიშსწორების კანონიერება. შემოწმებით კოტე კაპანაძემ და თეიმურაზ იარაჯულმა ვერ გამოავლინეს  ინდ. მეწარმე `აიდინ მაილივი~-ს მიერ ჩადენილი დასაბეგრი ობიექტის დამალვის გზით გადასახადისაგან თავის არიდების ფაქტი და 2007 წლის 7 აგვისტოს  შემოწმების აქტით  დამატებით არ დაარიცხეს მას საშემოსავლო გადასახადში 39685 ლარი, სოციალურში 86360 ლარი, აგრეთვე ჯარიმა 82363 ლარი  ე.ი. სულ 208408 ლარი.
თელავის რაიონული სასამართლოს მოსამართლემ მიიჩნია, რომ კოტე კაპანაძემ და თეიმურაზ იარაჯულმა ჩაიდინეს არა საქართველოს სსკ-ის 332-ე მუხლის პირველი ნაწილით გათვალისწინებული დანაშაული, არამედ საქართველოს სსკ-ის 342-ე მუხლის პირველი ნაწილით გათვალისწინებული დანაშაული, კერძოდ, სამსახურებრივი გულგრილობა.
კოტე კაპანაძის და თეიმურაზ იარაჯულის მიერ საქართველოს სსკ-ის 342-ე მუხლის პირველი ნაწილით გათვალისწინებული დანაშაულის ჩადენა სასამართლო გამოძიებისას დადასტურდა განსასჯელ თეიმურაზ იარაჯულის აღიარებითი ჩვენებით, გეგმიური გასვლითი საგადასახადო შემოწმების აქტით, ინდ. მეწარმე `აიდინ მაილივის~ საფინანსო-სამეურნეო საქმიანობის დოკუმენტური რევიზიის 2009 წლის 8 ივნისის აქტით, 2009 წლის 11 ივნისის #5 საბუღალტრო ექსპერტიზის დასკვნითა და მოწმეების ჩვენებებით.
კოტე კაპანაძემ არ აღიარა ჩადენილი დანაშაული, ხოლო რაც შეეხება თეიმურაზ იარაჯულს, მან ითანამშრომლა წინასწარ გამოძიებასთან, აღიარა ჩადენილი დანაშაული, ამასთან არის ინვალიდი (ამპუტირებული აქვს ცალი ფეხი).
აღნიშნულის გათვალისწინებით, კოტე კაპანაძე ცნობილი იქნა დამნაშავედ საქართველოს სსკ-ის 342-ე მუხლის პირველი ნაწილით და სასჯელის სახით განესაზღვრა თავისუფლების აღკვეთა 2 (ორი) წლის და 6 (ექვსი) თვის ვადით. მასვე, დამატებითი სასჯელის სახით ჩამოერთვა თანამდებობის დაკავების უფლება 1 (ერთი) წლის ვადით.
თეიმურაზ იარაჯული ცნობილი იქნა დამნაშავედ საქართველოს სსკ-ის 342-ე მუხლის პირველ ნაწილით და სასჯელის სახით განესაზღვრა თავისუფლების აღკვეთა 1 (ერთი) წლის და 6 (თვის) ვადით, რაც ჩაეთვალა პირობით, 2 (ორი) წლის გამოსაცდელი ვადით. მასვე, დამატებითი სასჯელის სახით, დაეკისრა ჯარიმა 2000 (ორი ათასი) ლარის ოდენობით და ჩამოერთვა თანამდებობის დაკავების უფლება 1 (ერთი) წლის ვადით.