საქართველოს უზენაესი სასამართლო
საქართველოს სასამართლოების ფორუმი
გამოქვეყნებულია: 14/08/2012
4-5 აგვისტოს, ბათუმში, საქართველოს სასამართლოებმა 2012 წლის პირველი ნახევრის საქმიანობის შედეგები შეაჯამეს.
კონფერენციას უძღვებოდნენ საქართველოს უზენაესი სასამართლოს თავმჯდომარე, კონსტანტინე კუბლაშვილი და საქართველოს იუსტიციის უმაღლესი საბჭოს მდივანი, ვალერი ცერცვაძე.
კონფერენციაზე იუსტიციის უმაღლესმა საბჭომ წარმოადგინა სასამართლოების საქმიანობის სტატისტიკური მონაცემები. შედეგები ცხადყოფს მოსამართლეთა საქმიანობის ეფექტურობის ზრდას. საქართველოს სასამართლოებში დაცული არის საქმის განხილვის ვადები, საქმეთა ნაშთმა მნიშვნელოვნად იკლო.
კონფერენციის მონაწილეებმა განიხილეს სასამართლო რეფორმის აქტუალური საკითხები, მათ შორის, მოსამართლის საქმიანობის ეფექტურობის შეფასების ქართული სტანდარტები და უცხოური გამოცდილება.
კონფერენციის მეორე დღე დაეთმო სასამართლო ხელისუფლებაში მიმდინარე ინოვაციების პრეზენტირებას. კონფერენციის მონაწილეები გაეცნენ საქართველოს სასამართლოების პორტალის, სამართლის ელექტრონული ბიბლიოთეკის, ხარისხის მართვის პროგრამის, უფასო იურიდიული კონსულტაციის პორტალისა და სხვა მნიშვნელოვანი პროექტებს.
კონფერენციას ესწრებოდნენ შეერთებული შტატების საერთაშორისო განვითარების სააგენტოსა (USAID) და აღმოსავლეთ-დასავლეთის მართვის ინსტიტუტის (EWMI) წარმომადგენლები.
კონფერენცია ჩატარდა მართლმსაჯულების დამოუკიდებლობისა და სამართლებრივი გაძლიერების პროექტის (JILEP) მხარდაჭერით.
კონფერენციის ბოლოს მონაწილეებმა სათაფლიის კარსტული მღვიმეები და განახლებული ანაკლია დაათვალიერეს.
