საკასაციო საჩივრის განუხილველად დატოვების შესახებ

№ბს-11-7(k-13) 6 მარტი, 2013 წელი

ქ. თბილისი

ადმინისტრაციულ საქმეთა პალატამ

შემდეგი შემადგენლობით:

ნუგზარ სხირტლაძე (თავმჯდომარე, მომხსენებელი);

მოსამართლეები: ლევან მურუსიძე, პაატა სილაგაძე

საქართველოს სამოქალაქო საპროცესო კოდექსის 401-ე მუხლის შესაბამისად, ზეპირი მოსმენის გარეშე შეამოწმა ი/მ ,,პ. ბ-ის“ საკასაციო საჩივრის წარმოებაში მიღების საკითხი.

თბილისის სააპელაციო სასამართლოს ადმინისტრაციულ საქმეთა პალატის 28.11.12წ. განჩინებით ი/მ ,,პ. ბ-ის“ სააპელაციო საჩივარი არ დაკმაყოფილდა, უცვლელად დარჩა თბილისის საქალაქო სასამართლოს ადმინისტრაციულ საქმეთა კოლეგიის 13.09.12წ. გადაწყვეტილება. აღნიშნული განჩინება საკასაციო საჩივრით გაასაჩივრა ი/მ ,,პ. ბ-მა“.

საქართველოს უზენაესი სასამართლოს ადმინისტრაციულ საქმეთა პალატის 21.01.13წ. განჩინებით კასატორს – ი/მ ,,პ. ბ-ს“ დაევალა ხარვეზის შესახებ განჩინების ჩაბარებიდან 7 დღის ვადაში საქართველოს უზენაეს სასამართლოში სახელმწიფო ბაჟის – 300 ლარის გადახდის ქვითრის წარმოდგენა. ამასთან, კასატორს განემარტა, რომ აღნიშნულ ვადაში ხარვეზის შეუვსებლობის შემთხვევაში საკასაციო საჩივარი არ დაიშვებოდა და დარჩებოდა განუხილველი. 04.02.13წ. ი/მ ,,პ. ბ-მა“ განცხადებით მომართა საქართველოს უზენაეს სასამართლოს და ბაჟის გადახდის 30 დღით გადავადება მოითხოვა. საქართველოს უზენაესი სასამართლოს ადმინისტრაციულ საქმეთა პალატის 04.02.13წ. განჩინებით კასატორის შუამდგომლობა დაკმაყოფილდა ნაწილობრივ და ი/მ ,,პ.ბ-ს“ გაუგრძელდა ხარვეზის შევსების საპროცესო ვადა 7 დღით. აღნიშნული განჩინების ასლი სსსკ-ის 70-78-ე მუხლების მოთხოვნათა შესაბამისად გაეგზავნა კასატორს. განჩინების ასლი 07.02.13წ. ჩაბარდა კასატორის ნათესავს. ვინაიდან განჩინების ჩაბარების დასტურიდან ვერ დგინდებოდა განჩინების მიმღები სუბიექტის ვინაობა კასატორისათვის განჩინების გადაცემის დადასტურების მიზნით 13.02.13წ. შედგა სატელეფონო აქტი, რომლითაც კასატორმა დაადასტურა, რომ განჩინების მისთვის გადაცემა მოხდა 13.02.13წ. აღნიშნულიდან გამომდინარე, სამოქალაქო საპროცესო კოდექსის მე-60 მუხლის შესაბამისად, ხარვეზის შევსების ვადის დენა 14.02.13წ. დაიწყო და 20.02.13წ. ოცდაოთხ საათზე ამოიწურა. საკასაციო საჩივრის ავტორს განჩინებით დადგენილ ვადაში არ მოუმართავს საკასაციო სასამართლოსათვის, რაც მისი საკასაციო საჩივრის განუხილველად დატოვების საფუძველს წარმოადგენს.

აღნიშნულიდან გამომდინარე, საკასაციო სასამართლოს მიაჩნია, რომ საქართველოს სამოქალაქო საპროცესო კოდექსის 396-ე მუხლის მე-3 ნაწილის თანახმად, ი/მ ,,პ. ბ-ის“ საკასაციო საჩივარი უნდა დარჩეს განუხილველად.

ს ა რ ე ზ ო ლ უ ც ი ო ნ ა წ ი ლ ი:

საკასაციო სასამართლომ იხელმძღვანელა საქართველოს ადმინისტრაციული საპროცესო კოდექსის პირველი მუხლის მე-2 ნაწილით, სამოქალაქო საპროცესო კოდექსის 396-ე მუხლის მე-3 ნაწილით, 401-ე მუხლებით და

დ ა ა დ გ ი ნ ა:

1. ი/მ ,,პ. ბ-ის“ საკასაციო საჩივარი თბილისის სააპელაციო სასამართლოს ადმინისტრაციულ საქმეთა პალატის 28.11.12წ. განჩინებაზე დატოვებულ იქნეს განუხილველად;

2. საქართველოს უზენაესი სასამართლოს განჩინება საბოლოოა და არ საჩივრდება.

თავმჯდომარე ნ. სხირტლაძე

მოსამართლეები: ლ. მურუსიძე

პ. სილაგაძე