საკასაციო საჩივრის განუხილველად დატოვების შესახებ

საქმე №ბს-368-362(კ-15) 12 ოქტომბერი, 2015 წელი

ქ. თბილისი

ადმინისტრაციულ საქმეთა პალატამ:

შემდეგი შემადგენლობით:

ნუგზარ სხირტლაძე (თავმჯდომარე; მომხსენებელი)

ლევან მურუსიძე, მაია ვაჩაძე

საქართველოს სამოქალაქო საპროცესო კოდექსის 408-ე მუხლის შესაბამისად, ზეპირი მოსმენის გარეშე, შეამოწმა ი/მ გ. ქ-ის საკასაციო საჩივრის დასაშვებობის საკითხი თბილისის სააპელაციო სასამართლოს ადმინისტრაციულ საქმეთა პალატის 17.03.2015წ. განჩინებაზე.

თბილისის სააპელაციო სასამართლოს ადმინისტრაციულ საქმეთა პალატის 17.03.2015წ. განჩინებით ი/მ გ. ქ-ის სააპელაციო საჩივარი არ დაკმაყოფილდა და უცვლელად იქნა დატოვებული თბილისის საქალაქო სასამართლოს ადმინისტრაციულ საქმეთა კოლეგიის 30.06.2014წ. გადაწყვეტილება, რომლითაც ი/მ გ. ქ-ის სარჩელი არ დაკმაყოფილდა.

თბილისის სააპელაციო სასამართლოს ზემოაღნიშნული განჩინება საკასაციო წესით გაასაჩივრა ი/მ გ. ქ-მა.

საქართველოს უზენაესი სასამართლოს 12.06.2015წ. ხარვეზის შესახებ განჩინებით ი/მ გ. ქ-ის შუამდგომლობა სახელმწიფო ბაჟის გადახდის გადავადების თაობაზე არ დაკმაყოფილდა და მას დაევალა ხარვეზის შესახებ განჩინების ჩაბარებიდან 10 დღის ვადაში ხარვეზის შევსება და საქართველოს უზენაეს სასამართლოში უზენაესი სასამართლოს ანგარიშზე სახელმწიფო ბაჟის - 407,8 ლარის გადახდის ქვითრის წარმოდგენა. კასატორს განემარტა, რომ ხარვეზის ვადაში შეუვსებლობის შემთხვევაში საკასაციო საჩივარი დარჩებოდა განუხილველი.

24.07.2015წ. საკასაციო სასამართლოს განცხადებით მომართა კასატორმა, განცხადებას დაურთო მხოლოდ 100 ლარის გადახდის დამადასტურებელი ქვითარი და მოითხოვა მატერიალური სიდუხჭირიდან გამომდინარე ხარვეზის შევსების ვადის გაგრძელება გონივრული ვადით.

საქართველოს უზენაესი სასამართლოს 03.08.2015წ. განჩინებით ი/მ გ. ქ-ს გაუგრძელდა საქართველოს უზენაესი სასამართლოს 12.06.2015წ. ხარვეზის შესახებ განჩინებით განსაზღვრული ხარვეზის შევსების საპროცესო ვადა 14 (თოთხმეტი) დღით და მასვე დაევალა სახელმწიფო ბაჟის - 307,8 ლარის გადახდის დამადასტურებელი ქვითრის დედნის საქართველოს უზენაეს სასამართლოში წარმოდგენა.

21.08.2015წ. საკასაციო სასამართლოს განცხადებით კვლავ მომართა კასატორმა, განცხადებას დაურთო კვლავ მხოლოდ 100 ლარის გადახდის დამადასტურებელი ქვითარი და მოითხოვა ხარვეზის შევსების ვადის გაგრძელება გონივრული ვადით.

უზენაესი სასამართლოს 11.09.2015წ. განჩინებით ი/მ გ. ქ-ს გაუგრძელდა საქართველოს უზენაესი სასამართლოს 12.06.2015წ. ხარვეზის შესახებ განჩინებით განსაზღვრული ხარვეზის შევსების საპროცესო ვადა 7 (შვიდი) დღით და მასვე დაევალა სახელმწიფო ბაჟის - 207,8 ლარის გადახდის დამადასტურებელი ქვითრის დედნის საქართველოს უზენაეს სასამართლოში წარმოდგენა.

კასატორმა ი/მ გ. ქ-მა 02.10.2015წ. სასამართლოს განცხადებით მომართა, განცხადებას დაურთო 100 (ასი) ლარის გადახდის დამადასტურებელი ქვითარი და კვლავ იშუამდგომლა სახელმწიფო ბაჟის დარჩენილი ნაწილის გადახდისათვის გარკვეული დროის მიცემა.

საკასაციო სასამართლო გაეცნო რა საქმის მასალებს, მიაჩნია, რომ ი/მ გ. ქ-ის საკასაციო საჩივარი დატოვებულ უნდა იქნეს განუხილველად, შემდეგ გარემოებათა გამო:

სამოქალაქო საპროცესო კოდექსით დადგენილია ვადები ამა თუ იმ მოქმედების შესრულებისათვის, ამასთან, დადგენილია სასამართლოს მიერ მხარეთათვის განსაზღვრულ საპროცესო ვადაში საპროცესო მოქმედების შეუსრულებლობის შედეგები, კერძოდ, თუ მხარემ სასამართლოს მიერ დანიშნულ საპროცესო ვადაში არ შეასრულა საპროცესო მოქმედება, იგი კარგავს ამ მოქმედების შესრულების შესაძლებლობას.

საქართველოს სამოქალაქო საპროცესო კოდექსის 59.1. მუხლის შესაბამისად, საპროცესო მოქმედება სრულდება კანონით დადგენილ ვადაში, ამავე მუხლის მე-2 ნაწილის პირველი წინადადების შესაბამისად, თუ საპროცესო ვადა კანონით არ არის დადგენილი, მას განსაზღვრავს სასამართლო. საქართველოს სამოქალაქო საპროცესო კოდექსის 396-ე მუხლის მე-3 ნაწილის თანახმად, თუ საკასაციო საჩივარი არ უპასუხებს ამ მუხლში ჩამოთვლილ მოთხოვნებს ან სახელმწიფო ბაჟი არ არის გადახდილი, სასამართლო ავალებს საჩივრის შემტან პირს, შეავსოს ხარვეზი, რისთვისაც უნიშნავს მას ვადას. თუ ამ ვადაში ხარვეზი არ იქნება შევსებული ან საკასაციო საჩივარი არ არის შეტანილი კანონით დადგენილ ვადაში, საკასაციო საჩივარი განუხილველი დარჩება. კასატორს საქართველოს უზენაესი სასამართლოს ადმინისტრაციულ საქმეთა პალატის 12.06.2015წ. განჩინებით დადგენილი ხარვეზი არ შეუვსია, მიუხედავად მისთვის საპროცესო ვადის არაერთგზის გაგრძელებისა.

აღნიშნულიდან გამომდინარე, საკასაციო სასამართლოს მიაჩნია, რომ საქართველოს სამოქალაქო საპროცესო კოდექსის 396-ე მუხლის მე-2 და მე-3 ნაწილისა და 401-ე მუხლის თანახმად, საკასაციო საჩივარი დატოვებულ უნდა იქნეს განუხილველი.

ყოველივე ზემოაღნიშნულიდან გამომდინარე, საკასაციო სასამართლო მიიჩნევს, რომ ი/მ გ. ქ-ის საკასაციო საჩივარი დატოვებულ უნდა იქნეს განუხილველად, სსსკ-ის 396.3 მუხლის შესაბამისად, სასამართლოს მიერ განსაზღვრულ საპროცესო ვადაში ხარვეზის შეუვსებლობის გამო.

ს ა რ ე ზ ო ლ უ ც ი ო ნ ა წ ი ლ ი:

საკასაციო სასამართლომ იხელმძღვანელა საქართველოს ადმინისტრაციული საპროცესო კოდექსის პირველი მუხლის მე-2 ნაწილით, სამოქალაქო საპროცესო კოდექსის 396.3, 399-ე, 447-ე მუხლებით და

დ ა ა დ გ ი ნ ა:

1. ი/მ გ. ქ-ის საკასაციო საჩივარი დატოვებულ იქნეს განუხილველად;

2. ლ. ლ-ეს (პ/ნ...) დაუბრუნდეს საკასაციო საჩივარზე 01.06.2015წ. №1 საგადახდო დავალებით გადახდილი სახელმწიფო ბაჟი 100 ლარი და 20.08.2015წ. №1 საგადახდო დავალებით გადახდილი სახელმწიფო ბაჟი 100 ლარი.

3. გ. ქ-ს (პ/ნ ...) დაუბრუნდეს საკასაციო საჩივარზე 24.07.2015წ. №1 საგადახდო დავალებით გადახდილი სახელმწიფო ბაჟი 100 ლარი და 02.10.2015წ. №1 საგადახდო დავალებით გადახდილი სახელმწიფო ბაჟი 100 ლარი.

4. საკასაციო სასამართლოს განჩინება საბოლოოა და არ საჩივრდება.

თავმჯდომარე ნ. სხირტლაძე

მოსამართლეები: ლ. მურუსიძე

მ. ვაჩაძე