საკასაციო საჩივრის განუხილველად დატოვების შესახებ

ბს-377-372(კ-16) 8 ივნისი, 2016 წელი

ქ. თბილისი

ადმინისტრაციულ საქმეთა პალატამ:

შემდეგი შემადგენლობით:

ნუგზარ სხირტლაძე (თავმჯდომარე; მომხსენებელი)

მაია ვაჩაძე, ვასილ როინიშვილი

საქართველოს სამოქალაქო საპროცესო კოდექსის 401-ე მუხლის შესაბამისად, ზეპირი მოსმენის გარეშე შეამოწმა სსიპ აღსრულების ეროვნული ბიუროს საკასაციო საჩივრის წარმოებაში მიღების საკითხი თბილისის სააპელაციო სასამართლოს ადმინისტრაციულ საქმეთა პალატის 11.02.16წ. განჩინებაზე.

თბილისის საქალაქო სასამართლოს ადმინისტრაციულ საქმეთა კოლეგიის 09.07.15წ. გადაწყვეტილებით მ. ბ-ის სარჩელი დაკმყოფილდა. ბათილად იქნა ცნობილი სსიპ აღსრულების ეროვნული ბიუროს თავმჯდომარის 18.11.13წ. №1479 ბრძანება. უკანონოდ იქნა ცნობილი სსიპ აღსრულების ეროვნული ბიუროს ქმედება მ. ბ-ის მიერ გირაოს სახით შეტანილი თანხის 6000 (ექვსი ათასი) ლარის სახელმწიფო ბიუჯეტში გადარიცხვის თაობაზე; დაევალა აღსრულების ეროვნულ ბიუროს მ. ბ-ის მიერ ვ. ტ-ის სასარგებლოდ 29.04.13წ. გირაოს სახით გადახდილი 6000 (ექვსი ათასი) ლარის დაბრუნება.

გადაწყვეტილება სააპელაციო წესით გაასაჩივრა სსიპ აღსრულების ეროვნულმა ბიურომ, რომელმაც გასაჩივრებული გადაწყვეტილების გაუქმების გზით სარჩელის დაკმაყოფილებაზე უარის თქმის შესახებ ახალი გადაწყვეტილების მიღება მოითხოვა.

თბილისის სააპელაციო სასამართლოს ადმინისტრაციულ საქმეთა პალატის 11.02.16წ. განჩინებით სააპელაციო საჩივარი არ დაკმაყოფილდა.

განჩინება საკასაციო წესით გაასაჩივრა სსიპ აღსრულების ეროვნულმა ბიურომ.

20.05.2016წ. ხარვეზის შესახებ განჩინებით საკასაციო სასამართლომ მიიჩნია, რომ სსიპ აღსრულების ეროვნული ბიუროს საკასაციო საჩივარი არ აკმაყოფილებდა საქართველოს სამოქალაქო საპროცესო კოდექსის 396.3 მუხლისა და ამავე კოდექსის 39.1 მუხლის „გ“ ქვეპუნქტის მოთხოვნებს, რამდენადაც საკასაციო საჩივარზე კასატორს არ ჰქონდა გადახდილი სახელმწიფო ბაჟი, რის გამოც მითითებული განჩინებით კასატორს დაევალა ხარვეზის შესახებ განჩინების ჩაბარებიდან 7 დღის ვადაში ხარვეზის შევსება და საქართველოს უზენაეს სასამართლოში სახელმწიფო ბაჟის გადახდის ქვითრის დედნის წარმოდგენა. ამასთან, კასატორს განემარტა, რომ ხარვეზის ვადაში შეუვსებლობის შემთხვევაში საკასაციო საჩივარი დარჩებოდა განუხილველი.

აღნიშნული განჩინება ჩაბარდა სსიპ აღსრულების ეროვნულ ბიუროს 30.05.2016წ., რაც დასტურდება გზავნილზე დასმული სსიპ აღსრულების ეროვნული ბიუროს ბეჭდით.

07.06.2016წ. სსიპ აღრულების ეროვნული ბიუროს წარმომადგენელმა ე. ახალკაცმა განცხადებით მომართა საკასაციო სასამართლოს და წარმოადგინა სახელმწიფო ბაჟის გადახდის დამადასტურებელი ქვითრის დედანი.

საკასაციო სასამართლო წარმოდგენილი განცხადების გაცნობის შედეგად თვლის, რომ სსიპ აღსრულების ეროვნული ბიუროს საკასაციო საჩივარი განუხილველად უნდა იქნეს დატოვებული, რადგან სსკ-ის 396-ე მუხლის მე-3 ნაწილის მიხედვით, თუ საკასაციო საჩივარი არ უპასუხებს აქ ჩამოთვლილ მოთხოვნებს ან სახელმწიფო ბაჟი არ არის გადახდილი, სასამართლო ავალებს საჩივრის შემტან პირს, შეავსოს ხარვეზი, რისთვისაც უნიშნავს მას ვადას. თუ ამ ვადაში ხარვეზი არ იქნება შევსებული ან საკასაციო საჩივარი არ არის შეტანილი კანონით დადგენილ ვადაში, საკასაციო საჩივარი განუხილველი დარჩება. ხარვეზის შევსების შესახებ განჩინება სსიპ აღსრულების ეროვნულ ბიუროს ჩაბარდა 30.05.2016წ.. ამდენად, ხარვეზის შევსების საპროცესო ვადა იწურებოდა 7 დღის შემდეგ - 06.06.2016წ. კასატორის წარმომადგენლის მიერ სახელმწიფო ბაჟის გადახდის ქვითრის დედანი შემოტანილ იქნა განსაზღვრული საპროცესო ვადის დარღვევით - 07.06.2016წ. .

ზემოაღნიშნულიდან გამომდინარე, ვინაიდან კასატორმა ხარვეზის შევსებისთის განსაზღვრულ საპროცესო ვადაში არ შეავსო სასამართლოს მიერ დადგენილი ხარვეზი, საკასაციო სასამართლოს მიაჩნია, რომ საქართველოს სამოქალაქო საპროცესო კოდექსის 396-ე მუხლის მე-3 ნაწილის თანახმად, სსიპ აღსრულების ეროვნული ბიუროს საკასაციო საჩივარი დატოვებულ უნდა იქნას განუხილველად. ამასთან, საკასაციო სასამართლოს მიაჩნია, რომ სსსკ-ის 447-ე მუხლის შესაბამისად, სსიპ აღსრულების ეროვნულ ბიუროს უნდა დაუბრუნდეს საკასაციო საჩივარზე მის მიერ 06.06.2016წ. №06851 საგადახდო მოთხოვნით გადახდილი სახელმწიფო ბაჟი - 300 (სამასი) ლარი.

ს ა რ ე ზ ო ლ უ ც ი ო ნ ა წ ი ლ ი:

საკასაციო სასამართლომ იხელმძღვანელა საქართველოს ადმინისტრაციული საპროცესო კოდექსის პირველი მუხლის მე-2 ნაწილით, სამოქალაქო საპროცესო კოდექსის 396-ე მუხლის მე-3 ნაწილით, 401-ე მუხლებით და

დ ა ა დ გ ი ნ ა:

1. სსიპ აღსრულების ეროვნული ბიუროს საკასაციო საჩივარი დატოვებულ იქნეს განუხილველად;

2. სსიპ აღსრულების ეროვნულ ბიუროს (ს/კ. 205263873) დაუბრუნდეს საკასაციო საჩივარზე მის მიერ 06.06.2016წ. №06851 საგადახდო მოთხოვნით გადახდილი სახელმწიფო ბაჟი - 300 (სამასი) ლარი;

3. საქართველოს უზენაესი სასამართლოს განჩინება საბოლოოა და არ საჩივრდება.

თავმჯდომარე ნ. სხირტლაძე

მოსამართლეები: მ.ვაჩაძე

ვ. როინიშვილი