კერძო საჩივრის განუხილველად დატოვების შესახებ
№ბს-1036 (კს-18) 27 სექტემბერი, 2018წ.
ქ. თბილისი
ადმინისტრაციულ საქმეთა პალატამ
შემდეგი შემადგენლობით:
ნუგზარ სხირტლაძე (თავმჯდომარე, მომხსენებელი),
მოსამართლეები: მაია ვაჩაძე, ვასილ როინიშვილი
საქართველოს სამოქალაქო საპროცესო კოდექსის 408-ე მუხლის შესაბამისად, ზეპირი მოსმენის გარეშე, შევამოწმე ლ. და ლე. ჩ-ების კერძო საჩივრის დასაშვებობის საკითხი ქუთაისის სააპელაციო სასამართლოს ადმინისტრაციულ საქმეთა პალატის 20.07.2018წ. დადგენილებაზე.
ქუთაისის საქალაქო სასამართლოს 30.06.2018წ. დადგენილებით ლ. და ლე. ჩ-ები ცნობილი იქნენ სამართალდამრღვევებად და ადმინისტრაციული სახდელის სახით დაეკისრათ ჯარიმის გადახდა 1000 ლარის ოდენობით. დადგენილება გაასაჩივრეს ლ. და ლე. ჩ-ებმა ქუთაისის სააპელაციო სასამართლოში.
ქუთაისის სააპელაციო სასამართლოს ადმინისტრაციულ საქმეთა პალატის 20.07.2018წ. დადგენილებით განუხილველად დარჩა საჩივარი იმ საფუძვლით, რომ სააპელაციო სასამართლოში საჩივარი წარდგენილი იქნა ადმინისტრაციულ სამართალდარღვევათა კოდექსის 2341 მუხლით დადგენილი 10 დღიანი ვადის დარღვევით, რომლის ათვლა დაიწყო დადგენილების გამოცხადებიდან და არა დადგენილების მხარეთათვის ჩაბარების მომენტიდან. ამავე დადგენილებით საჩივრის ავტორებს განემარტათ, რომ დადგენილება იყო საბოლოო და არ საჩივრდებოდა.
ლ. და ლე. ჩ-ებმა დადგენილებაზე წარმოადგინეს კერძო საჩივარი და აღნიშნეს, რომ დადგენილების ჩაბარებიდან 10 დღის ვადაში წარადგინეს საჩივარი, რის გამოც არასწორად დარჩა მათი საჩივარი განუხილველად.
საკასაციო სასამართლო საქმის მასალების გაცნობის, წარმოდგენილი კერძო საჩივრის და გასაჩივრებული დადგენილების გაცნობის შედეგად მიიჩნევს, რომ ლ. და ლე. ჩ-ის საჩივარი უნდა დარჩეს განუხილველად დაუშვებლობის მოტივით, შემდეგ გარემოებათა გამო:
საქმის მასალებით დადგენილია, რომ ქუთაისის საქალაქო სასამართლოს 30.06.2018წ. დადგენილებით ლ. და ლე. ჩ-ები ცნობილი იქნენ სამართალდამრღვევებად და ადმინისტრაციული სახდელის სახით დაეკისრათ ჯარიმის გადახდა 1000-1000 ლარის ოდენობით. დადგენილება გაასაჩივრეს ლ. და ლე. ჩ-ებმა ქუთაისის სააპელაციო სასამართლოში.
ქუთაისის სააპელაციო სასამართლოს ადმინისტრაციულ საქმეთა პალატის 20.07.2018წ. დადგენილებით საჩივარი დარჩა განუხილველად იმ საფუძვლით, რომ სააპელაციო სასამართლოში საჩივარი წარდგენილი იქნა ადმინისტრაციულ სამართალდარღვევათა კოდექსის 273-ე მუხლით დადგენილი 10 დღიანი ვადის დარღვევით, რომლის ათვლა დაიწყო დადგენილების გამოცხადებიდან. ამავე დადგენილებით საჩივრის ავტორებს განემარტათ, რომ დადგენილება იყო საბოლოო და არ საჩივრდებოდა.
საკასაციო პალატა აღნიშნავს, რომ სააპელაციო სასამართლოს გასაჩივრებული დადგენილებით მხარეს მართებულად განემარტა, რომ დადგენილება გასაჩივრებას არ ექვემდებარება, ვინაიდან ადმინისტრაციულ სამართალდარღვევათა კოდექსის 276.5 მუხლი განსაზღვრავს, რომ სააპელაციო სასამართლოს გადაწყვეტილება ადმინისტრაციული სამართალდარღვევის საქმეზე საბოლოოა და არ გასაჩივრდება. ზემოაღნიშნულიდან გამომდინარე, საკასაციო პალატა თვლის, რომ კერძო საჩივარი უნდა დარჩეს განუხილველი დაუშვებლობის გამო.
ანალოგიურ საკითხზე საკასაციო სასამართლოს მიღებული აქვს არაერთი განჩინება (სუსგ 13.07.2018წ. საქმე №ბს-802(კს-18), 22.04.2016წ. #ბს-294-292(კ-16) და სხვ.).
ამდენად, საკასაციო სასამართლო მიიჩნევს, რომ კერძო საჩივარი ქუთაისის სააპელაციო სასამართლოს 20.07.2018წ. დადგენილების გაუქმების თაობაზე უნდა დარჩეს განუხილველი დაუშვებლობის გამო, რამდენადაც არ არსებობს განსახილველად მისი დაშვების წინაპირობა.
ს ა რ ე ზ ო ლ უ ც ი ო ნ ა წ ი ლ ი:
საკასაციო სასამართლომ იხელმძღვანელა საქართველოს ადმინისტრაციული საპროცესო კოდექსის პირველი მუხლით, საქართველოს სამოქალაქო საპროცესო კოდექსის 396-ე მუხლის მე-3 ნაწილით და
დ ა ა დ გ ი ნ ა:
1. განუხილველი დარჩეს ლ. და ლე. ჩ-ების კერძო საჩივარი დაუშვებლობის გამო;
2. საქართველოს უზენაესი სასამართლოს განჩინება საბოლოოა და არ საჩივრდება.
თავმჯდომარე ნ. სხირტლაძე
მოსამართლეები: მ. ვაჩაძე
ვ. როინიშვილი
