საკასაციო საჩივრის განუხილველად დატოვების შესახებ

საქმე ბს-1441 (კ-18) 07 მარტი, 2019 წელი

ქ. თბილისი

ადმინისტრაციულ საქმეთა პალატა

შემადგენლობა:

ნუგზარ სხირტლაძე (თავმჯდომარე; მომხსენებელი)

მაია ვაჩაძე, ვასილ როინიშვილი

საქართველოს სამოქალაქო საპროცესო კოდექსის 396-ე მუხლის შესაბამისად, ზეპირი მოსმენის გარეშე შევამოწმე ა. ნ-ის საკასაციო საჩივრის წარმოებაში მიღების საკითხი თბილისის სააპელაციო სასამართლოს ადმინისტრაციულ საქმეთა პალატის 31.05.2018წ. განჩინებაზე.

საკასაციო სასამართლოს 30.11.2018წ. განჩინებით საკასაციო საჩივარზე დადგინდა ხარვეზი იმ საფუძვლით, რომ იგი არ აკმაყოფილებდა საქართველოს სამოქალაქო საპროცესო კოდექსის 39-ე მუხლის პირველი ნაწილის „გ” ქვეპუნქტის მოთხოვნებს. კერძოდ, კასატორს საკასაციო საჩივარზე არ ჰქონდა გადახდილი სახელმწიფო ბაჟი დავის საგნის ღირებულების 5 პროცენტის ოდენობით. ამასთანავე, საკასაციო საჩივარი არ იყო შედგენილი სსკ-ის 396-ე მუხლის შესაბამისად. კასატორს დაევალა სახელმწიფო ბაჟის გადახდის დამადასტურებელი ქვითრის დედნისა და სსკ-ის 396-ე მუხლის შესაბამისად შედგენილი დასაბუთებული საკასაციო საჩივრის წარმოდგენა. დადგენილ ვადაში კასატორმა განცხადებით მომართა სასამართლოს და იშუამდგომლა ხარვეზის შესავსებად დადგენილი საპროცესო ვადის გაგრძელება იმ საფუძვლით, რომ ხარვეზის შევსებისათვის დადგენილი ვადა არასაკმარისი აღმოჩნდა ხარვეზის შესავსებად.

საკასაციო სასამართლოს 27.12.2018წ. განჩინებით გაგრძელდა საკასაციო საჩივარზე დადგენილი ხარვეზის შევსების საპროცესო ვადა 07 დღით. დადგენილ ვადაში კასატორმა განცხადებით მომართა სასამართლოს და წარმოადგინა სახელმწიფო ბაჟის გადახდის დამადასტურებელი ქვითრის დედანი. ვინაიდან კასატორს არ ჰქონდა წარმოდგენილი სსკ-ის 396-ე მუხლის შესაბამისად შედგენილი დასაბუთებული საკასაციო საჩივარი, საკასაციო სასამართლოს 18.01.2019წ. განჩინებით კასატორს გაუგრძელდა ხარვეზის შევსებისათვის დადგენილი საპროცესო ვადა 05 დღით და დაევალა სსკ-ის 396-ე მუხლის შესაბამისად შედგენილი დასაბუთებული საკასაციო საჩივრის წარმოდგენა. კასატორს განემარტა, რომ ხარვეზის შეუვსებლობის შემთხვევაში საკასაციო საჩივარი დატოვებული იქნებოდა განუხილველად.

საკასაციო პალატა აღნიშნავს, რომ სასამართლო განჩინების ასლს უგზავნის უშუალოდ მხარეს ან მის წარმომადგენელს, წარმომადგენლისათვის გაგზავნილი დოკუმენტი მიიჩნევა მხარისათვის გაგზავნილად (სასკ-ის 13.2 მუხ.). განჩინება მხარისათვის და მისი წარმომადგენლისათვის ჩაბარებულად ჩაითვლება, თუ იგი ჩაჰბარდება ერთ-ერთ მათგანს (სსსკ-ის 70.1 მუხ.). განსახილველ შემთხვევაში ხარვეზის ვადის გაგრძელების შესახებ საკასაციო სასამართლოს 18.01.2019წ. განჩინება საქმეში მითითებულ მისამართზე გაეგზავნა კასატორის წარმომადგენელს მ.ტ-ს და 25.01.2019წ. ჩაბარდა უფლებამოსილ პირს. ხარვეზის გამოსწორებისთვის განჩინებით განსაზღვრული ვადა ამოიწურა 2019 წლის 30 იანვარს (ოთხშაბათი) 24 საათზე. კასატორს სასამართლოს მიერ დადგენილი ხარვეზი არ გამოუსწორებია და არც ხარვეზის გამოსწორებისათვის დადგენილი ვადის გაგრძელება მოუთხოვია.

სსკ-ის 396-ე მუხლის მე-3 ნაწილის თანახმად, თუ საკასაციო საჩივარი არ უპასუხებს ჩამოთვლილ მოთხოვნებს ან სახელმწიფო ბაჟი არ არის გადახდილი, სასამართლო ავალებს საჩივრის შემტან პირს, შეავსოს ხარვეზი, რისთვისაც უნიშნავს მას ვადას. თუ ამ ვადაში ხარვეზი არ იქნება შევსებული ან საკასაციო საჩივარი არ არის შეტანილი კანონით დადგენილ ვადაში, საკასაციო საჩივარი განუხილველი დარჩება.

აღნიშნულიდან გამომდინარე, საკასაციო სასამართლოს მიაჩნია, რომ სსკ-ის 396.3 და 399-ე მუხლების თანახმად, ა. ნ-ის საკასაციო საჩივარი უნდა დარჩეს განუხილველად.

ს ა რ ე ზ ო ლ უ ც ი ო ნ ა წ ი ლ ი:

საკასაციო სასამართლომ იხელმძღვანელა საქართველოს ადმინისტრაციული საპროცესო კოდექსის პირველი მუხლის მე-2 ნაწილით, სამოქალაქო საპროცესო კოდექსის 396-ე, 399-ე მუხლებით და

დ ა ა დ გ ი ნ ა:

1. თბილისის სააპელაციო სასამართლოს ადმინისტრაციულ საქმეთა პალატის 31.05.2018წ. განჩინებაზე ა. ნ-ის საკასაციო საჩივარი დატოვებულ იქნეს განუხილველად;

2. კ. მ-ის (...) დაუბრუნდეს ა. ნ-ის საკასაციო საჩივარზე 18.12.2018წ. N0 საგადასახადო დავალებით გადახდილი სახელმწიფო ბაჟი - 300 ლარი, შემდეგი ანგარიშიდან: ქ. თბილისი, სახელმწიფო ხაზინა, ბანკის კოდი TRESGE22, მიმღების ანგარიშის N200122900, სახაზინო კოდი N 300773150;

3. საქართველოს უზენაესი სასამართლოს განჩინება საბოლოოა და არ საჩივრდება.

თავმჯდომარე: ნ. სხირტლაძე

მოსამართლეები: მ. ვაჩაძე

ვ. როინიშვილი