საქმე N:ბს-1266(კ-18)

საქმე ბს-1266(კ-18) 15 იანვარი, 2019 წელი

ქ. თბილისი

ადმინისტრაციულ საქმეთა პალატამ:

შემდეგი შემადგენლობით:

ვასილ როინიშვილი (თავმჯდომარე; მომხსენებელი)

მაია ვაჩაძე, ნუგზარ სხირტლაძე

განიხილა ე. ნ-ის, თ. ნ-ისა და თ. ბ-ის წარმომადგენლის 2019 წლის 9 იანვრის განცხადება საქმის წარმოების კასატორის - ე. ნ-ის მიმართ მოთხოვნის ნაწილში შეწყვეტის თაობაზე.

სასამართლომ გამოარკვია:

სსიპ შემოსავლების სამსახურმა 2016 წლის 5 ივლისს სარჩელი აღძრა ახალციხის რაიონულ სასამართლოში მოპასუხეების - ე. ნ-ის, თ. ნ-ისა და თ. ბ-ის მიმართ მათი ცრუმაგიერ პირებად ცნობის მოთხოვნით.

ახალციხის რაიონული სასამართლოს 2017 წლის 19 აპრილის გადაწყვეტილებით სსიპ შემოსავლების სამსახურის სარჩელი დაკმაყოფილდა, ი/მ თ. ბ-ი, ე. ნ-ი და თ. ნ-ი ცნობილ იქნენ ერთიმეორის ცრუმაგიერ პირებად. აღნიშნული გადაწყვეტილება სააპელაციო წესით გასაჩივრდა ე. ნ-ის, თ. ნ-ისა და თ. ბ-ის მიერ.

თბილისის სააპელაციო სასამართლოს ადმინისტრაციულ საქმეთა პალატის 2018 წლის 31 იანვრის განჩინებით არ დაკმაყოფილდა ე. ნ-ის, თ. ნ-ისა და თ. ბ-ის სააპელაციო საჩივარი, უცვლელად დარჩა ახალციხის რაიონული სასამართლოს 2017 წლის 19 აპრილის გადაწყვეტილება. თბილისის სააპელაციო სასამართლოს გადაწყვეტილება საკასაციო წესით გასაჩივრდა ე. ნ-ის, თ. ნ-ისა და თ. ბ-ის მიერ.

საქართველოს უზენაესი სასამართლოს ადმინისტრაციულ საქმეთა პალატის 2018 წლის 22 ოქტომბრის განჩინებით ე. ნ-ის, თ. ნ-ისა და თ. ბ-ის საკასაციო საჩივარი წარმოებაში იქნა მიღებული ე. ნ-ის მოთხოვნის ნაწილში, ხოლო 2018 წლის 7 დეკემბრის განჩინებით ე. ნ-ის, თ. ნ-ისა და თ. ბ-ის საკასაციო საჩივარი წარმოებაში იქნა მიღებული თ. ნ-ისა და თ. ბ-ის მოთხოვნის ნაწილში.

2019 წლის 9 იანვარს კასატორების წარმომადგენელმა განცხადებით მომართა საქართველოს უზენაეს სასამართლოს და ერთ-ერთი კასატორის - ე. ნ-ის 2018 წლის 14 დეკემბერს გარდაცვალების გამო, მოითხოვა საქართველოს სამოქალაქო საპროცესო კოდექსის 272-ე მუხლის „ე“ ქვეპუნქტის საფუძველზე, (საქმის ერთ-ერთ მხარედ მყოფი მოქალაქის გარდაცვალების გამო) სსიპ შემოსავლების სამსახურის სარჩელზე ე. ნ-ის მიმართ მოთხოვნის ნაწილში საქმის წარმოების შეწყვეტა.

ს ა მ ო ტ ი ვ ა ც ი ო ნ ა წ ი ლ ი:

საკასაციო სასამართლო საქმის მასალების შესწავლის, წარმოდგენილი განცხადების განხილვის შედეგად მიიჩნევს, რომ განცხადება უნდა დაკმაყოფილდეს და სსიპ შემოსავლების სამსახურის სარჩელზე ე. ნ-ის მიმართ მოთხოვნის ნაწილში შეწყდეს საქმის წარმოება, შემდეგ გარემოებათა გამო:

=12187000367 გარდაცვალების მოწმობით დასტურდება, რომ კასატორი - ე. ნ-ი 2018 წლის 14 დეკემბერს გარდაიცვალა. სამოქალაქო საპროცესო კოდექსის 272-ე მუხლის „ე“ ქვეპუნქტის თანახმად, სასამართლო, მხარეთა განცხადებით ან თავისი ინიციატივით, შეწყვეტს საქმის წარმოებას, თუ საქმის ერთ-ერთ მხარედ მყოფი მოქალაქის გარდაცვალების შემდეგ ან იურიდიული პირის ლიკვიდაციისას სადავო სამართლებრივი ურთიერთობიდან გამომდინარე, დაუშვებელია უფლებამონაცვლეობა. საკასაციო სასამართლო, არსებული სასარჩელო მოთხოვნიდან და დავის საგნიდან გამომდინარე, მიიჩნევს, რომ განსახილველ დავაში უფლებამონაცვლეობა დაუშვებელია.

ყოველივე ზემოაღნიშნულიდან გამომდინარე, საკასაციო სასამართლო მიიჩნევს, რომ სსკ-ის 272-ე მუხლის „ე“ ქვეპუნქტის საფუძველზე, სსიპ შემოსავლების სამსახურის სარჩელზე ე. ნ-ის მიმართ მოთხოვნის ნაწილში, უნდა შეწყდეს საქმის წარმოება.

ს ა რ ე ზ ო ლ უ ც ი ო ნ ა წ ი ლ ი:

საკასაციო სასამართლომ იხელმძღვანელა ადმინისტრაციული საპროცესო კოდექსის პირველი მუხლის მე-2 ნაწილით, სამოქალაქო საპროცესო კოდექსის 272-ე, 273-ე, 284-ე, 399-ე მუხლებით და

დ ა ა დ გ ი ნ ა:

1. ე. ნ-ის, თ. ნ-ისა და თ. ბ-ის წარმომადგენლის განცხადება დაკმაყოფილდეს;

2. სსიპ შემოსავლების სამსახურის სარჩელზე ე. ნ-ის მიმართ მოთხოვნის ნაწილში შეწყდეს საქმის წარმოება ე. ნ-ის გარდაცვალების გამო;

3. განემარტოთ მხარეებს, რომ საქმის წარმოების შეწყვეტის შემთხვევაში სასამართლოსათვის ხელმეორედ მიმართვა დავაზე იმავე მხარეებს შორის, იმავე საგანზე და იმავე საფუძვლით არ დაიშვება;

4. საქართველოს უზენაესი სასამართლოს განჩინება საბოლოოა და არ საჩივრდება.

თავმჯდომარე: ვ. როინიშვილი

მოსამართლეები: მ. ვაჩაძე

ნ. სხირტლაძე