ა-782-შ-32-04 17 მაისი, 2004 წ., ქ. თბილისი

საქართველოს უზენაესი სასამართლოს სამოქალაქო, სამეწარმეო და გაკოტრების საქმეთა პალატა

შემადგენლობა: მ. გოგიშვილი (თავმჯდომარე),

ლ. გოჩელაშვილი,

მ. წიქვაძე

საქმის ზეპირი მოსმენის გარეშე განიხილა უკრაინის რესპუბლიკის მოქალაქის _ ა. ნ.-ისა და ჟოვტნევის რაიონული სასამართლოს მოსამართლის _ ა.ს.-ის შუამდგომლობები ამავე სასამართლოს 1996წ. 9 ოქტომბრის გადაწყვეტილების საქართველოს ტერიტორიაზე ცნობისა და აღსრულების შესახებ, ზ.ი ნ.-ის მიმართ ალიმენტის დაკისრების თაობაზე.

აღწერილობითი ნაწილი:

ა. ნ.-მა სარჩელი აღძრა სასამართლოში ზ. ნ.-ის მიმართ ალიმენტის დაკისრების თაობაზე. მოსარჩელემ მიუთითა, რომ მოპასუხესთან იმყოფებოდა რეგისტრირებულ ქორწინებაში. 1996წ. 24 აპრილს მათ შეეძინათ ქალიშვილი ლ.; ვინაიდან ზ.ნ.-ი არანაირ დახმარებას არ უწევდა მოსარჩელეს, ა.ნ.-მა მიმართა სასამართლოს და მოითხოვა ზ.ნ.-ისათვის ალიმენტის დაკისრება.

ქ.ლუგანსკის ჟოვტნევის რაიონული სასამართლოს მოსამართლის _ ა.ს.-ის ცნობით, მოპასუხეს სასამართლო სხდომის დროის შესახებ დროულად ეცნობა და სასამართლო უწყებაც ჩაბარდა, მაგრამ ის პროცესზე არ გამოცხადებულა.

ზემოხსენებული სასამართლოს 1996წ. 9 ოქტომბრის გადაწყვეტილებით ზ. ნ.-ს დაეკისრა 1996წ. 3 ოქტომბრიდან ყოველთვიურად ხელფასის ¼1/4-ის და სახელმწიფო ბაჟის სახით 5 გრივნისა და 20 კაპიკის გადახდა. აღნიშნული გადაწყვეტილება ძალაში შევიდა 1996წ. 9 ოქტომბერს და რუსეთის ფედერაციის ტერიტორიაზე აღსრულდა 1998წ. 1 მაისამდე.

უკრაინის რესპუბლიკის მოქალაქე _ ა. ნ.-მ და ჟოვტნევის რაიონული სასამართლოს მოსამართლე _ ა.ს.-მ შუამდგომლობებით მიმართეს საქართველოს უზენაეს სასამართლოს ქ. ლუგანსკის ჟოვტნევის რაიონული სასამართლოს 1996წ. 9 ოქტომბრის გადაწყვეტილების საქართველოს ტერიტორიაზე ცნობისა და აღსრულების შესახებ.

საქართველოს უზენაესი სასამართლოს სამოქალაქო, სამეწარმეო და გაკოტრების საქმეთა პალატის 2004წ. 13 აპრილის განჩინებით უკრაინის რესპუბლიკის ქ.ლუგანსკის მოქალაქის ა. ნ.-ისა და ჟოვტნევის რაიონული სასამართლოს მოსამართლის ა.ს.-ის შუამდგომლობები ამავე სასამართლოს 1996წ. 9 ოქტომბრის გადაწყვეტილების საქართველოს ტერიტორიაზე ცნობისა და აღსრულების შესახებ, მიღებულ იქნა წარმოებაში.

სამოტივაციო ნაწილი:

პალატა გაეცნო საქმის მასალებს და თვლის, რომ უკრაინის რესპუბლიკის მოქალაქის _ ა. ნ.-ისა და ჟოვტნევის რაიონული სასამართლოს მოსამართლის _ ა.ს.-ის შუამდგომლობები უნდა დაკმაყოფილდეს შემდეგ გარემოებათა გამო:

დადგენილია, რომ ჟოვტნევის რაიონული სასამართლოს 1996წ. 9 ოქტომბრის გადაწყვეტილებით ზ. ნ.-ს დაეკისრა 1996წ. 3 ოქტომბრიდან ყოველთვიურად ხელფასის ¼1/4-ის და სახელმწიფო ბაჟის სახით 5 გრივნისა და 20 კაპიკის გადახდა. აღნიშნული გადაწყვეტილება ძალაში შევიდა 1996წ. 9 ოქტომბერს და რუსეთის ფედერაციის ტერიტორიაზე აღსრულდა 1998წ. 1 მაისამდე.

უკრაინის რესპუბლიკის მოქალაქე _ ა. ნ.-მ და ჟოვტნევის რაიონული სასამართლოს მოსამართლე _ ა.ს.-მ შუამდგომლობებით მიმართეს საქართველოს უზენაეს სასამართლოს ქ.ლუგანსკის ჟოვტნევის რაიონული სასამართლოს 1996წ. 9 ოქტომბრის გადაწყვეტილების საქართველოს ტერიტორიაზე ცნობისა და აღსრულების შესახებ.

«საერთაშორისო კერძო სამართლის შესახებ» საქართველოს კანონის 68-69-ე მუხლების თანახმად, არსებობს ყველა საფუძველი, რომ საქართველოს უზენაესი სასამართლოს სამოქალაქო, სამეწარმეო და გაკოტრების საქმეთა პალატამ ცნოს ქ.ლუგანსკის ჟოვტნევის რაიონული სასამართლოს 1996წ. 9 ოქტომბრის გადაწყვეტილება.

სარეზოლუციო ნაწილი:

პალატამ იხელმძღვანელა ,,საერთაშორისო კერძო სამართლის შესახებ» საქართველოს კანონის 68-69-ე მუხლებით, სსკ-ის 284-ე მუხლით, «სამოქალაქო, საოჯახო და სისხლის სამართლის საქმეებზე სამართლებრივი დახმარებისა და სამართლებრივ ურთიერთობათა შესახებ» 1993წ. მინსკის კონვენციით და

დ ა ა დ გ ი ნ ა :

უკრაინის რესპუბლიკის მოქალაქის _ ა. ნ.-ისა და ჟოვტნევის რაიონული სასამართლოს მოსამართლის _ ა.ს.-ის შუამდგომლობები ამავე სასამართლოს 1996წ. 9 ოქტომბრის გადაწყვეტილების საქართველოს ტერიტორიაზე ცნობისა და აღსრულების შესახებ დაკმაყოფილდეს.

ქ.ლუგანსკის ჟოვტნევის რაიონული სასამართლოს 1996წ. 9 ოქტომბრის გადაწყვეტილება ცნობილ იქნეს და დაექვემდებაროს აღსრულებას.

აღნიშნული გადაწყვეტილების ასლი და სააღსრულებო ფურცელი აღსასრულებლად გადაეგზავნოს იუსტიციის სამინისტროს სააღსრულებო დეპარტამენტს.

საკასაციო პალატის განჩინება საბოლოოა და არ გასაჩივრდება.