№ა-2265-შ-65-2014 24 ივლისი, 2014 წელი,

ქ.თბილისი

სამოქალაქო საქმეთა პალატა

შემადგენლობა:

ვასილ როინიშვილი (თავმჯდომარე, მომხსენებელი),

ბესარიონ ალავიძე, პაატა ქათამაძე

საქმის განხილვის ფორმა - ზეპირი განხილვის გარეშე

განცხადების ავტორი - ს. ა-ი

გადაწყვეტილება, რომლის საქართველოს ტერიტორიაზე ცნობასაც მხარე მოითხოვს - სომხეთის რესპუბლიკის არმავირის რეგიონის საერთო იურისპრუდენციის პირველი ინსტანციის სასამართლოს 2014 წლის 12 თებერვლის გადაწყვეტილება

დავის საგანი - უგზო-უკვლოდ დაკარგულად აღიარება

ა ღ წ ე რ ი ლ ო ბ ი თ ი ნ ა წ ი ლ ი:

სომხეთის რესპუბლიკის არმავირის რეგიონის საერთო იურისპრუდენციის პირველი ინსტანციის სასამართლოს 2014 წლის 12 თებერვლის გადაწყვეტილებით ს. ა-ის განცხადება დაკმაყოფილდა და განმცხადებლის ბავშვის მამა, ე. ქ. ძე ი-ი აღიარებულ იქნა უგზო-უკვლოდ დაკარგულად 2013 წლის 1 იანვრიდან.

საქართველოს უზენაეს სასამართლოს განცხადებით მომართა ს. ა-მა და მოითხოვა ზემოაღნიშნული გადაწყვეტილების საქართველოს ტერიტორიაზე ცნობა.

შუამდგომლობის ავტორის მიერ წარმოდგენილი გადაწყვეტილებით დასტურდება, რომ ის კანონიერ ძალაში შევიდა.

ს ა მ ო ტ ი ვ ა ც ი ო ნ ა წ ი ლ ი:

საკასაციო სასამართლო გაეცნო რა წარმოდგენილ შუამდგომლობას და თანდართულ მასალებს, მივიდა იმ დასკვნამდე, რომ აღნიშნული შუამდგომლობა უნდა დაკმაყოფილდეს შემდეგ გარემოებათა გამო:

„საერთაშორისო კერძო სამართლის შესახებ“ კანონის 68-ე მუხლის პირველი პუნქტის მიხედვით, საქართველო ცნობს უცხო ქვეყნის კანონიერ ძალაში შესულ სასამართლო გადაწყვეტილებებს. იმავე მუხლის მე-5 პუნქტის მიხედვით კი, უცხო ქვეყნის სასამართლო გადაწყვეტილების ცნობის საკითხს იხილავს საქართველოს უზენაესი სასამართლო.

სომხეთის რესპუბლიკის არმავირის რეგიონის საერთო იურისპრუდენციის პირველი ინსტანციის სასამართლოს 2014 წლის 12 თებერვლის გადაწყვეტილებით ს. ა-ის განცხადება დაკმაყოფილდა და განმცხადებლის ბავშვის მამა, ე. ქ. ძე ი-ი აღიარებულ იქნა უგზო-უკვლოდ დაკარგულად 2013 წლის 1 იანვრიდან.

შუამდგომლობის ავტორი ს. ა-ი აღნიშნული გადაწყვეტილების საქართველოს ტერიტორიაზე ცნობის იურიდიულ ინტერესად მიუთითებს იმ გარემოებას, რომ მას, როგორც საქართველოს მოქალაქეს, სურს თავისი არასრულწლოვანი შვილისათვის ორმაგი მოქალაქეობის მინიჭება, რისთვისაც საჭიროა ორივე მშობლის თანხმობის წარდგენა. ა. ი-ის მამა ე. ი-ი კი, ცნობილია უგზო-უკვლოდ დაკარგულად.

საკასაციო სასამართლო მიიჩნევს, რომ მოცემულ შემთხვევაში არ არსებობს „საერთაშორისო კერძო სამართლის შესახებ“ კანონის 68-ე მუხლის მე-2 პუნქტით გათვალისწინებული უცხო ქვეყნის გადაწყვეტილების საქართველოს ტერიტორიაზე ცნობის დამაბრკოლებელი გარემოებები, ამასთან მხარე მიუთითებს დასაბუთებული იურიდიული ინტერესის არსებობაზე, რის გამოც ს. ა-ის შუამდგომლობა უნდა დაკმაყოფილდეს.

ს ა რ ე ზ ო ლ უ ც ი ო ნ ა წ ი ლ ი:

საკასაციო სასამართლომ იხელმძღვანელა „საერთაშორისო კერძო სამართლის შესახებ“ საქართველოს კანონის 68-ე მუხლით, სამოქალაქო საპროცესო კოდექსის 284-ე მუხლით და

დ ა ა დ გ ი ნ ა:

1. ს. ა-ის შუამდგომლობა დაკმაყოფილდეს;

2. ცნობილ იქნეს საქართველოს ტერიტორიაზე სომხეთის რესპუბლიკის არმავირის რეგიონის საერთო იურისპრუდენციის პირველი ინსტანციის სასამართლოს 2014 წლის 12 თებერვლის გადაწყვეტილება, რომლის საფუძველზეც ს. ა-ის განცხადება დაკმაყოფილდა და განმცხადებლის ბავშვის მამა, ე. ქ. ძე ი-ი აღიარებულ იქნა უგზო-უკვლოდ დაკარგულად 2013 წლის 1 იანვრიდან;

3. განჩინება საბოლოოა და არ გასაჩივრდება

თავმჯდომარე ვ. როინიშვილი

მოსამართლეები ბ. ალავიძე

პ. ქათამაძე