15 მარტი, 2019 წელი

საქმე №ას-375-2019 თბილისი

სამოქალაქო საქმეთა პალატა

მოსამართლე: მზია თოდუა

სამოქალაქო საქმეთა პალატამ საქმის ზეპირი მოსმენის გარეშე განიხილა შპს „დ.ფ.ჯ–სა“ და ა.ქ–ის საკასაციო საჩივრის წარმოებაში მიღების საკითხი თბილისის სააპელაციო სასამართლოს სამოქალაქო საქმეთა პალატის 2018 წლის 1 ნოემბრის განჩინებაზე საქმეზე შპს „დ.ფ.ჯ–ას“ სარჩელთან დაკავშირებით მოპასუხე შ.კ–სა და მესამე პირი დამოუკიდებელი სასარჩელო მოთხოვნის გარეშე ა.ქ–ის მიმართ, საზოგადოებიდან პარტნიორის გარიცხვისა და საკუთრების უფლების ჩამორთმევის თაობაზე

პ ა ლ ა ტ ა მ გ ა მ ო ა რ კ ვ ი ა :

ა.ქ–ის საკასაციო საჩივარი უნდა დარჩეს განუხილველად, ხოლო, რაც შეეხება შპს „დ.ფ.ჯ–ას“ საკასაციო საჩივარს, ის ხარვეზიანია და საკასაციო საჩივრის ავტორს უნდა განესაზღვროს ვადა ხარვეზის შესავსებად, შემდეგ გარემოებათა გამო :

საქართველოს სამოქალაქო საპროცესო კოდექსის (შემდეგში: სსსკ) 391-ე მუხლის პირველი ნაწილის თანახმად, სააპელაციო სასამართლოს გადაწყვეტილებები მხარეებმა და მესამე პირებმა დამოუკიდებელი სასარჩელო მოთხოვნით შეიძლება კანონით დადგენილ ვადაში გაასაჩივრონ საკასაციო სასამართლოში.

პალატა აღნიშნავს, რომ თბილისის საქალაქო სასამართლოს 2016 წლის 23 დეკემბრის გადაწყვეტილების თანახმად, მოცემულ საქმეში ა.ქ. წარმოადგენს მესამე პირს დამოუკიდებელი სასარჩელო მოთხოვნის გარეშე, რომელიც არ არის აღჭურვილი სააპელაციო სასამართლოს განჩინების გასაჩივრების უფლებით.

სსსკ-ის 88-ე მუხლის პირველი ნაწილის თანახმად, თითოეულ დაინტერესებულ პირს, რომელიც აცხადებს მოთხოვნას დავის საგანზე ან მის ნაწილზე, შეუძლია აღძრას სარჩელი ორივე ან ერთ-ერთი მხარის მიმართ მხარეთა პაექრობის დაწყებამდე (მესამე პირები დამოუკიდებელი სასარჩელო მოთხოვნით). ამავე კოდექსის 91-ე მუხლის თანახმად, მესამე პირები, რომლებიც არ აცხადებენ დამოუკიდებელ მოთხოვნებს დავის საგანზე, სარგებლობენ მხარეთა საპროცესო უფლებებით და მათ ეკისრებათ მხარეთა საპროცესო მოვალეობები, გარდა უფლებისა, გაადიდონ ან შეამცირონ სასარჩელო მოთხოვნის ოდენობა, შეცვალონ სარჩელის საფუძველი ან საგანი, ცნონ სარჩელი, უარი თქვან სარჩელზე ან მორიგდნენ, აღძრან შეგებებული სარჩელი, მოითხოვონ სასამართლო გადაწყვეტილების იძულებითი აღსრულება.

განსახილველ შემთხვევაში, ა.ქ. წარმოადგენს რა მესამე პირს დამოუკიდებელი სასარჩელო მოთხოვნის გარეშე, ის ვერ იქნება მიჩნეული გასაჩივრების უფლების მქონე სუბიექტად, შესაბამისად, მას უარი უნდა ეთქვას სააპელაციო სასამართლოს განჩინების საკასაციო წესით გასაჩივრების უფლებაზე. აქვე უნდა აღინიშნოს, რომ მას შეუძლია აღძრას დამოუკიდებელი სარჩელი და აღნიშნული გზით იდაოს საკუთარი უფლებების დასაცავად.

საქართველოს სამოქალაქო საპროცესო კოდექსის (შემდეგში - სსსკ) 396-ე მუხლის პირველი ნაწილის „ე“ ქვეპუნქტის თანახმად, საკასაციო საჩივარი უნდა შეიცავდეს მითითებას, თუ რა მოცულობით საჩივრდება გადაწყვეტილება, გასაჩივრების საფუძვლებს (კასაციის მიზეზები) და განმარტებას იმის თაობაზე, მოითხოვს თუ არა მომჩივანი გადაწყვეტილების გაუქმებასა თუ შეცვლას (კასაციის განაცხადი). ამავე მუხლის მესამე ნაწილის თანახმად, თუ საკასაციო საჩივარი არ უპასუხებს ამ მუხლში ჩამოთვლილ მოთხოვნებს ან სახელმწიფო ბაჟი არ არის გადახდილი, სასამართლო ავალებს საჩივრის შემტან პირს, შეავსოს ხარვეზი, რისთვისაც უნიშნავს მას ვადას. თუ ამ ვადაში ხარვეზი არ იქნება შევსებული, ან საკასაციო საჩივარი არ არის შეტანილი კანონით დადგენილ ვადაში, საკასაციო საჩივარი განუხილველი დარჩება.

მოცემულ შემთხვევაში საკასაციო საჩივარში მითითებულია კასატორის მოთხოვნა, თუმცა ის არ შეიცავს კასაციის საფუძვლებს და არ არის გადახდილი სახელმწიფო ბაჟი, რაც ხარვეზის დადგენის საფუძველია.

სსსკ-ის 39-ე მუხლის მესამე ნაწილის „გ“ ქვეპუნქტის თანახმად, სახელმწიფო ბაჟის ოდენობა საკასაციო საჩივარზე იურიდიული პირისათვის არ უნდა აღემატებოდეს 8 000 ლარს. მოცემულ შემთხვევაში, დავის საგნის ღირებულებიდან გამომდინარე, საკასაციო საჩივრის ავტორს უნდა დაევალოს 8 000 ლარის ოდენობით სახელმწიფო ბაჟის გადახდის დამადასტურებელი დოკუმენტის დედნის წარმოდგენა. ამასთან, კასატორს უნდა დაევალოს წარმოადგინოს დასაბუთებული საკასაციო საჩივარი კასაციის საფუძვლების მითითებით.

ყოველივე ზემოაღნიშნულიდან გამომდინარე, საკასაციო პალატას მიაჩნია, რომ კასატორს უნდა მიეცეს ამ განჩინების ჩაბარებიდან 5 - დღიანი ვადა ხარვეზის აღმოსაფხვრელად.

ს ა რ ე ზ ო ლ უ ც ი ო ნ ა წ ი ლ ი :

საკასაციო პალატამ იხელმძღვანელა სსსკ-ის 396-ე, 399-ე, 401-ე, 284-ე, 285-ე, მუხლებით და

დ ა ა დ გ ი ნ ა :

1. ა. ქ–ის საკასაციო საჩივარი დარჩეს განუხილველად;

2. შპს „დ.ფ.ჯ–ას“ დაევალოს ამ განჩინების ასლის ჩაბარებიდან 5 (ხუთი) დღის ვადაში საქართველოს უზენაეს სასამართლოში წარმოადგინოს: ა) დაზუსტებული საკასაციო საჩივარი, კასაციის საფუძვლების მითითებით; და ბ) 8 000 (რვა ათასი) ლარის ოდენობით სახელმწიფო ბაჟის გადახდის დამადასტურებელი დოკუმენტის დედანი (ნაღდი ფულით ანგარიშსწორების შემთხვევაში წარმოდგენილი უნდა იქნეს საგადახდო დავალება და სალაროს შემოსავლის ორდერი, ხოლო უნაღდო ანგარიშსწორების შემთხვევაში – საგადახდო საბუთი, რომელზედაც დასმულია მომსახურე ბანკის შტამპი - „განაღდებულია“);

3. სახელმწიფო ბაჟი გადახდილ იქნეს შემდეგ ანგარიშზე: ქ. თბილისი, „სახელმწიფო ხაზინა“ ბანკის კოდი TRESGE22, მიმღების ანგარიშის №200122900, სახაზინო კოდი 300 773 150;

4. განემარტოს კასატორს, რომ თუ ამ ვადაში ხარვეზი არ შეივსება, საკასაციო საჩივარი არ მიიღება და განუხილველად დარჩება;

5. განჩინება საბოლოოა და არ საჩივრდება.

მოსამართლე : მზია თოდუა