¹ 3გ-ად-58-გ-02 27 იანვარი, 2003 წ., ქ. თბილისი

საქართველოს უზენაესი სასამართლოს ადმინისტრაციული და სხვა კატეგორიის საქმეთა პალატა

შემადგენლობა: ბ. მ.-ი (თავმჯდომარე),

ნ. ქადაგიძე,

გ. ქაჯაია

საქმეზე ზეპირი მოსმენის გარეშე განიხილა ქ. თბილისის ვაკე-საბურთალოს რაიონულ სასამართლოსა და თბილისის საოლქო სასამართლოს ადმინისტრაციული სამართლისა და საგადასახადო საქმეთა კოლეგიას შორის განსჯადობის შესახებ დავა საქმეზე სს გაერთიანებული ენერგოსისტემა «საქსრესენერგოს» სარჩელის გამო მოპასუხე მსხვილ გადამხდელთა საგადასახადო ინსპექციასთან.

აღწერილობითი ნაწილი:

სს გაერთიანებული ენერგეტიკული სისტემა «საქრუსენერგომ» სასარჩელო განცხადებით მიმართა ქ. თბილისის ვაკე-საბურთალოს რაიონულ სასამართლოს, რომლის საფუძველზეც მოითხოვა მსხვილ გადამხდელთა საგადასახადო ინსპექციის 2002წ. 20 დეკემბრის საინკასო დავალების 2500000 ლარის უვადო წესით ჩამოწერის თაობაზე გაუქმება და სს «საქრუსენერგოს» ანგარიშზე ყადაღის მოხსნა.

ქ. თბილისის ვაკე-საბურთალოს რაიონულმა სასამართლომ განსახილველი დავა მიიჩნია რა თბილისის საოლქო სასამართლოს ადმინისტრაციული სამართლისა და საგადასახადო საქმეთა კოლეგიის განსჯადად 2002წ. 26 დეკემბერის განჩინებით საქმე განსახილველად გადაუგზავნა ამ უკანასკნელს.

თბილისის საოლქო სასამართლოს ადმინისტრაციული სამართლისა და საგადასახადო საქმეთა კოლეგია არ დაეთანხმა ქ. თბილისის ვაკე-საბურთალოს რაიონული სასამართლოს ზემოაღნიშნულ განჩინებას და მიიჩნია, ვინაიდან სს «საქრუსენერგოს» სასარჩელო მოთხოვნა არ უკავშირდებოდა არც ადმინისტრაციული გარიგების დადებას ან შესრულებას და არც ადმინისტრაციული ორგანოს მიერ ზიანის ანაზღაურებას 500000 ლარის ზევით, ამდენად მითითებული დავა არ შეიძლება მიკუთვნებოდა საქართველოს ადმინისტარციული საპროცესო კოდექსის მე-6 მუხლით განსჯად საქმეთა კატეგორიას და აქვე მიუთითა, რომ მსხვილ გადამხდელთა საგადასახადო ინსპექცია არ წარმოადგენდა ამ ორგანოს, რომელთა ადმინისტრაციულ სამართლებრივი აქტების კანონიერების თაობაზე საქმეების განიხილვა, ამავე მუხლის შესაბამისად, წარმოადგენდა საოლქო სასამართლოს I ინსტანციის პრეროგატივას.

შესაბამისად, საქართველოს ადმინისტრაციული საპროცესო კოდექსის 26-ე მუხლის მე-3 ნაწილის თანახმად, განსჯადობის შესახებ დავის გადასაწყვეტად, საქმე გადმოეგზავნა საქართველოს უზენაეს სასამართლოს.

სამოტივაციო ნაწილი:

საკასაციო სასამართლო გაეცნო რა საქმის მასალებს და შეამოწმა თბილისის საოლქო სასამართლოს განჩინების კანონიერება მივიდა შემდეგ დასკვნამდე:

საკასაციო სასამართლო თვლის, რომ მოცემულ შემთხვევაში საკითხის გადაწყვეტა უნდა მოხდეს განსჯადობის ზოგადი პრინციპიდან გამომდინარე, კერძოდ, მხედველობაში უნდა იქნას მიღებული იმ ნიშნების ერთობლიობა რაც დამახასიათებელია ამ სახის დავებისათვის, რის შემდეგაც დავის განხილვა და გადაწყვეტა უნდა დაექვემდებაროს იმ სამართალწარმოების წესებს, რომელიც დამახასიათებელია მსგავსი კატეგორიის დავებისათვის. შესაბამისად, საკასაციო სასამართლო ვერ გაიზიარებს საოლქო სასამართლოს ადმინისტრაციული სამართლისა და საგადასახადო საქმეთა კოლეგიის მსჯელობას იმის თაობაზე, რომ საგადასახადაო დავები, რომელთა ღირებულებაც აღემატება 500000 ლარს, არ გამომდინარეობენ საქართველოს ადმინისტრაციული საპროცესო კოდექსის მე-6 მუხლის I ნაწილის «დ» პუნქტის დებულებიდან და ამდენად, არ მიეკუთვნებიან საოლქო სასამართლოს ინსტანციის წესით განსახილველ სარჩელს.

საკითხისადმი ამდაგვარი მიდგომა წარმოადგენს კანონის ფორმარულ გაგებას, რომელიც თავისი არსით ფაქტიურად ეწინააღმდეგება «საერთო სასამართლოების შესახებც ორგანულ კანონში ჩადებულ პრინციპებს. რომლის მე-20 მუხლის მე-2 ნაწილის «გ» პუნქტის შესაბამისადაც, საოლქო სასამართლოში იქმნება ადმინისტრაციული სამართლისა და საგადასახადო საქმეთა კოლეგია. თუ საკასაციო სასამართლო 500000 ლარზე ზემოთ საგადასახადო დავებთან მიმართებაში გაიზიარებს საოლქო სასამართლოს მსჯელობას, ეს, ფაქტობრივად, ნიშნავს, რომ საოლქო სასამართლოში I ინსტანციით საგადასახადო დავები საერთოდ არ იქნება აღნიშნული, რაც პრინციპშივე ეწინააღმდეგება კანონმდებლის მიზანს საოლქო სასამართლოში საგადასახადო კატეგორიის საქმეთა განხილვის მიზნით I ინსტანციის სასამართლოს შექმნის თაობაზე.

ყოველივე აღნიშნული, საკასაციო სასამართლოს აძლევს საფუძველს მიიჩნიოს, რომ საგადასახადო ურთიერთობიდან გამომდინარე დავა, რომლის ღირებულებაც აღემატება 500000 ლარს, ექვემდებარება საოლქო სასამართლოს ადმინისტრაციული სამართლისა და საგადასახადო საქმეთა კოლეგიას.

სარეზოლუციო ნაწილი:

საქართველოს უზენაესი სასამართლოს ადმინისტრაციული და სხვა კატეგორიის საქმეთა პალატამ იხელმძღვანელა საქართველოს ადმინისტრაციული საპრცოესო კოდექსის პირველი მუხლის მე-2 ნაწილით, 26-ე მუხლის მე-3 ნაწილით, სსკ-ს 408-ე მუხლის მე-3 ნაწილით და

დ ა ა დ გ ი ნ ა :

1. სს გაერთიანებულ ენერგეტიკულ სისტემა «საქრუსენერგოს» სარჩელი მსხვილ გადამხდელთა საგადასახადო ინსპექციის 2002წ. 20 დეკემბრის საინკასო დავალების 2500000 ლარის უვადო წესით ჩამოწერის გაუქმებისა და სს ანგარიშზე ყადაღის მოხსნის შესახებ განსჯადობით განსახილველად დაექვემდებაროს თბილისის საოლქო სასამართლოს ადმინისტრაციული სამართლისა და საგადასახადო საქმეთა კოლეგიას.

2. საკასაციო სასამართლოს განჩინება საბოლოოა და არ გასაჩივრდება.