მიმდინარე წლის 25 სექტემბერს, საქართველოს უზენაესი სასამართლოს სისხლის სამართლის საქმეთა პალატის თავმჯდომარე შალვა თადუმაძე და ამავე პალატის მოსამართლეები ლევან თევზაძე და ნინო სანდოძე შეხვდნენ ჰააგის სისხლის სამართლის საერთაშორისო სასამართლოს მოსამართლეებს და სისხლის სამართლის მიმართულებით მოღვაწე პროფესორებს  გერმანიიდან და დიდი ბრიტანეთიდან. დელეგაციის წარმომადგენლები თბილისში იმყოფებიან საერთაშორისო კონფერენციისა და საზაფხულო სკოლის ფარგლებში, რომელიც იმართება ფოლკსვაგენის სამეცნიერო ფონდის პროგრამის - „ინსტიტუციური ცვლილება და სოციალური პრაქტიკა. ცენტრალურ აზიასა და კავკასიაში პოლიტიკური სისტემის, ეკონომიკისა და საზოგადოების კვლევა“ მხარდაჭერით.

შეხვედრაზე გაიმართა საინტერესო დისკუსია სისხლის სამართლის სასამართლოს როლსა და არსებული გამოწვევების შესახებ. უზენაეს სასამართლოს სისხლის სამართლის საქმეთა პალატის თავმჯდომარემ და მოსამართლეებმა დეტალური ინფორმაცია მიაწოდეს სტუმრებს პალატის საქმიანობისა და მათთვის საინტერესო კითხვებზე საქართველოში მოქმედი სისხლის სამართლის კანონმდებლობის მიმართულებით. შეხვედრაზე ასევე ისაუბრეს ჰააგის სისხლის სამართლის საერთაშორისო სასამართლოსთან ურთიერთობების გააქტიურების, პროფესიული კავშირების გაძლიერებისა და გამოცდილების გაზიარების აუცილებლობაზე, ორმხრივი ურთიერთობის განვითარების მიზნით.