,,მარად და ყველგან, საქართველოვ, მე ვარ შენთანა!.. მე ვარო შენი თანამდევი, უკვდავი სული“. საუკუნეზე მეტია კრძალვით და რუდუნებით იმეორებს თითოეული ქართველი დიდი ილიას დატოვებულ სიტყვებს, საუკუნეზე მეტია ვფურცლავთ და ვიძირებით მისი ნაშრომების სიბრძნესა და სიღრმეში.

8 ნოემბერს დიდი ილია ჭავჭავაძის, საქართველოს უგვირგვინო მეფის, მისთვის წამებულისა და მისი გადამრჩენელის დაბადებიდან 187-ე წლისთავი აღინიშნება. საქართველოს თითოეულ მოქალაქეს, ჩვენს ყველა თანამემამულეს  ვულოცავთ ამ დღეს. ბედნიერია ერი, რომელსაც ასეთი დიდი სულიერი წინამძღოლი და სამართლიანი ლიდერი უბოძა შემოქმედმა.  მისი თითოეული სიტყვა თაობებისთვის იქცა სამშობლოსადმი სიყვარულის მთავარ შთაგონების წყაროდ და მზის ბრწყინვალებით ანათებს სამშობლოსათვის უანგაროდ მსახურთა გულებს.