მიმდინარე წლის 13 ნოემბერს საქართველოს უზენაესი სასამართლოს თავმჯდომარე ნინო ქადაგიძე გაეროს ბავშვთა ფონდის (UNICEF-ის) ახალ წარმომადგენელს, იესპერ მოლერს შეხვდა.

გაცნობითი ხასიათის შეხვედრაზე მხარეებმა ისაუბრეს გაეროს ბავშვთა ფონდის (UNICEF) აქტიური მხარდაჭერით საქართველოში ბავშვის უფლებათა დაცვის მიმართულებით მიღწეული პროგრესის თაობაზე. ასევე, განიხილეს არასრულწლოვანთა მართლმსაჯულებისა და ბავშვის უფლებათა კოდექსების ეროვნულ სასამართლო პრაქტიკაში ეფექტურად დანერგვის საკითხები.

შეხვედრის დასასრულს, საქართველოს უზენაესი სასამართლოს თავმჯდომარემ ხაზი გაუსვა ბავშვის უფლებათა დაცვის საერთაშორისო სტანდარტების ეროვნულ დონეზე ეფექტურად იმპლემენტაციის პროცესში გაეროს ბავშვთა ფონდთან შემდგომი თანამშრომლობის გაღრმავების მნიშვნელობას და წარმატება უსურვა იესპერ მოლერს საქართველოში UNICEF-ის წარმომადგენლის რანგში საქმიანობაში.