საქართველოს უზენაესი სასამართლოს მართლმსაჯულების მუზეუმი უერთდება 18 მაისს მუზეუმების საერთაშორისო დღის ყოველწლიურ აღნიშვნას.

საქართველოს უზენაესი სასამართლოს მართლმსაჯულების მუზეუმი უკვე 10 წელია ტრადიციულად მასპინძლობს ასეულობით მნახველს, რომელთა შორის მრავლად არიან სხვადასხვა ქვეყნის სახელმწიფო მოხელეები და უცხოეთიდან ჩამოსული ტურისტები. უნდა აღინიშნოს, რომ მართლმსაჯულების მუზეუმის ყველაზე ხშირი სტუმრები ჩვენი ქვეყნის ახალგაზრდები არიან, საჯარო სკოლების მოსწავლეები და უმაღლესი სასწავლებლების სტუდენტები. სასიხარულოა ის ფაქტიც, რომ 2022 წლიდან დღემდე მუზეუმის დამთვალიერებელთა რეკორდულად მაღალი რაოდენობა, 1900-მდე სტუმარი დაფიქსირდა. 

საქართველოს უზენაესი სასამართლოს ისტორიულ შენობასა და მართლმსაჯულების მუზეუმში ინფორმაციული ტურის ფარგლებში, სტუმრებს შესაძლებლობა აქვთ, შეხვდნენ მოსამართლეებს და მიიღონ ინფორმაცია სასამართლო სისტემის საქმიანობის თაობაზე.

მართლმსაჯულების მუზეუმი დღევანდელ დღეს განსაკუთრებით ელის ქართული მართლმსაჯულების ისტორიით დაინტერესებულ სტუმრებს, რომელთა სამახსოვრო ჩანაწერებიც ტრადიციულად აღიბეჭდება მუზეუმის შთაბეჭდილებათა წიგნში.